在天空之下講I do！香港3大戶外求婚地點推介

買咗求婚戒指，準備好求婚對白，下一步就係考慮求婚地點。屋企或者酒店房太無新意？其實香港有唔少戶外嘅地方，浪漫又有情調，無論係陽光普照嘅日頭、太陽西下嘅黃昏、定星光燦爛嘅晚上，都係求婚好時晨！

沙灘

香港四面環海，有唔少媲美外國嘅靚沙灘。可以趁夏天，下晝先同女朋友游水堆沙，之後同另一半喺海邊手拖手浪漫散步，最後就望住個海睇日落，呢個時候問佢「Will you marry me？」一定sure win！
沙灘建議：
淺水灣、梅窩銀礦灣、南丫島洪聖爺灣、貝澳

草地野餐

文青系嘅戀人可以搵個風和日麗嘅下午，帶埋親手整嘅愛心便當去草地野餐。喺緩緩微風之下，欣賞大自然嘅美景，然後再喺個野餐籃入面，將你一早準備好嘅戒指拎出嚟求婚，真係青春又浪漫！
野餐草地建議：
迪欣湖活動中心、添馬公園、大埔海濱公園、佐敦谷公園

中環摩天輪

歌都有得你唱，「天荒地老流連在摩天輪」，問10個女仔，10個都覺得摩天輪代表浪漫！望住璀璨嘅維港夜景，配合熱鬧嘅氣氛，喺摩天輪之下讀出你真摯感人嘅誓詞，呢場求婚一定好難忘。